Altjóða ambassadørskipan fyri føroysk lesandi

MFS søkir eftir ambassadørum til nýggja altjóða skipan fyri føroysk lesandi

 

Í Føroyum eru vit so heppin, at vit hava møguleika at lesa kring allan heim. Møguleikarnir eru nógvir, og eins ymisk sum lestrarlondini eru, eins ymiskar eru avbjóðingarnar, sum lesandi møta. Fyri at røkka út til allar okkara limir, eru vit í MFS í ferð við at seta eina nýggja ambassadørskipan í verk, og í hesum sambandi sóknast vit eftir ambassadørum.

Um skipanina

Endamálið við nýggju ambassadørskipanini er at geva okkara limum úti í heimi eina styrkta rødd í MFS og í føroyska samfelagnum. Vit vilja skapa eitt forum fyri føroysk lesandi úti í heimi, har tey verða hoyrd og vit lurta. Við skipanini økir MFS sína vitan um, hvat rørir seg millum limir okkara úti í heimi, og harvið betra vit fortreytirnar at virka fyri viðkomandi málum á einum upplýstum grundarlagi. Í fyrstu syftu søkja vit eftir lesandi í Onglandi, Póllandi, Skotlandi, Danmark, Íslandi, Norra og Svøríki. 

 

Ambassadørarnir

Sum ambassadørur umboðar tú títt lestrarland í MFS. Tú skalt samskifta við lesandi í tínum landi og við MFS. Tú verður boðin á fundir við nevndina fyri altjóða samstarv hjá MFS, har tú hevur møguleika at seta fram avbjóðingar og ynski, sum føroysk lesandi í tínum lestrarlandi hava. Tað verður kunngjørt á heimasíðuni hjá MFS, hvørjir ambassadørarnir eru, soleiðis at onnur lesandi í sama landi kunnu seta seg í samband við teg. Sum ambassadørur fyri MFS, verður tú partur av einum stimbrandi og mennandi netverki saman við føroyskum lesandi nær og fjar. 

 

Umsókn

Ert tú lesandi í einum av teimum nevndu londunum, so kanst tú senda eina umsókn til international@mfs.fo áðrenn 20. apríl 2021. Spurningar um skipanina kunnu sendast til sama teldupost.