Hans Jákup Juul, Frida Brockie Davidsen, Dánjal Hátún Augustinussen, Petur Simonsen

Í døgunum 16. – 19. oktober tók Meginfelag Føroyskra Studenta (MFS) ímóti lestrarfeløgum úr Íslandi og Grønlandi til NAIS-ráðstevnu í Føroyum (The North-Atlantic Islands’ Student Cooperation). Hetta er eitt samstarv, ið hevur til endamál at styrkja sambandið millum lesandi í Norðuratlantshavinum, varpa ljós á felags áhugamál og viðgera tær avbjóðingar, sum lesandi í hesum øki ofta møta.
Hetta var sættu ferð, at NAIS verður hildið, og tað var ein stórur heiður hjá MFS at vera vertur fyri tiltakinum heima í Føroyum.
NAIS arbeiðir við at menna hægri útbúgving í smáum, arktiskum samfeløgum, har serligar avbjóðingar ofta krevja serligar loysnir. Tí er tað av stórum týdningi, at lesandi fáa høvi at hittast, deila vitan og menna felags framtíðar ætlanir.
Frá MFS luttóku Petur Simonsen (altjóða skrivari), Frida Brockie Davidsen (samskiftis- og marknaðarførslustjóri), Dánjal Hátún Augustinussen (fíggjarstjóri) og Hans Jákup Juul (ráðslimur), sum øll hava verið ein virkin partur av at fyrireika og mynda ráðstevnuna her í Føroyum.
 

Vælkomin til Føroyar
Luttakararnir komu til Føroyar 16. Oktober og um kvøldið møttust vit til ein hugnaligan døgurða, har ið møguleiki var at hitta nýggjar, eins og gamlar, luttakarar.

 

Faklig frálæra og felags aðalmál
Ráðstevnan byrjaði 17. oktober í Norðurlandahúsinum, har vit fyrst greiddu frá virkseminum hjá MFS í altjóðahøpi, eitt nú í European Student Union (ESU) og NOM-samstarvinum. Endamálið var at geva luttakarunum eina felags fatan av, hvussu vit sum lestrarfeløg kunnu virka tvørtur um landamørk og ávirka útbúgvingarpolitikk á norðurlendskum og evropeiskum stigi.
Síðani var ein røð av læruríkum fyrilestrum. Osbjørn Jacobsen legði fram um ætlanunum av nýggja universitetsbýlinginum í Tórshavn, ið fer at hava stóra ávirkan á gerandisdagin hjá lesandi í Føroyum. Vit meta, at við at savna alt virksemið hjá Fróðskaparsetrinum og skapa ein felags miðdepil fyri lesandi, fæst eitt livandi og sterkt lestrarumhvørvi har lesandi kunnu breiða seg út bæði sosialt og yrkisliga.

Síðani legði Sigri Gaini fram um týdningin av hægri útbúgvingum í smáum arktiskum tjóðum og hvussu útbúgvingarpolitikkur og mentan ganga hond í hond.
Aftaná døgurða løgdu lestrarfeløgini LÍS, Ili Ili, Avalak og vit úr MFS fram sítt virksemi, framtíðarmál og eisini avbjóðingar, tey hvør sær arbeiða við. Her sást av álvara hvussu vit á hvør sín hátt eru ymisk men hava ótrúliga nógv í felag og hví sambandið millum feløgini í NAIS-samstarvinum er so týdningarmikið.

Seinnapartin arbeiddu luttakararnir í “workshops”, har tey mentu uppskot til framtíðar átøk og samstarv innan NAIS. Eisini var ein framløga frá NORA, sum gav innlit í møguleikar fyri fígging og menning av felags verkætlanum í norðuratlantiska økinum.
Dagurin endaði við einum felags døgurða og einum óformellum kvøldi, har felagsskapurin veruliga kom til sín rætt.
 

Náttúra, søga og NAIS-fundur
18. oktober fóru vit til Vestmannar, har ein bátur tók okkum nær at teimum hábærsligu Vestmannabjørgunum. Eitt av heilt vøkru náttúrusýnum í Føroyum. Veðrið vísti seg frá bestu síðu, og fleiri lýstu túrin sum eitt av hæddarpunktunum á ráðstevnuni.
Aftaná vitjaðu vit Vokssavnið í Vestmanna, sum við søgum gav luttakarunum innlit í ríka føroyska mentanararvinum.

Seinnapartin var sjálvur NAIS-fundurin hildin á Miðnámi í Vestmanna, har umboðini frá øllum londunum umrøddu komandi átøk, samstarvsmøguleikar og ynski fyri komandi ráðstevnur.
Kvøldið endaði við einum góðum døgurða og einum mentanarligum kvøldi, har luttakararnir deildu siðvenjur úr Føroyum, Íslandi og Grønlandi við mati, søgum, tónleiki og góðum práti úr heimlondum sínum.

 

Farvæl og eitt hjartaligt takk!
19. oktober var seinasti dagurin, har vit søgdu farvæl til luttakararnar, áðrenn vit øll fóru hvør til sítt aftur. Vit vilja eisini serliga takka Ili Ili, AVALAK og LÍS fyri at luttaka og geva nógv gott íkast til eina so væleydnaða ráðstevnu!