Tey ganga ikki í skjúrtu og slipsi, men eru tó beinhørð business-fólk. Tey ganga í jogging-klæðum og búgva heima hjá foreldrunum. Sum børn spældu tey ikki í fjøruni og í haganum. Tey spældu á internetinum, har øll heimsins vitan er tøk, og undirhaldið er ókeypis. Nú melda tey seg inn á virðisbrævamarknaðin, og fleiri og fleiri seta strong krøv: Fyritøkur og íløgufeløg skulu vera burðardygg. 
 

Seinastu árini hava vit í Betri Banka sæð ein vaksandi áhuga millum ung at gera íløgur í virðisbrøv. Orsakirnar eru ivaleyst nógvar. Ein orsøk er eitt størri forvitni og økt samskifti millum ung í bólkum og á sosialum miðlum um virðisbræva-marknaðin og einstøk virðisbrøv. Ein onnur orsøk til vaksandi áhugan er, at rentustøðið seinastu árini hevur verið metlágt. Eitt lágt rentustøði er gott, um ein til dømis fer at keypa sær ein bústað, tí fíggingin verður bíligari. Men eitt lágt rentu-støði er ikki gott fyri uppsparingar, sum standa kontant á kontu í bankanum. Lága rentan ger, at kundar ikki longur fáa eitt avkast við at hava eina uppsparing standandi kontant. Tí verður leitað eftir alternativum møguleikum, og at seta peningin í virðisbrøv – serliga partabrøv – er ein møguleiki. 
 

Vit gerast øll meira tilvitað um okkara leiklut í  heimssamfelagnum, og vit ynskja at taka ábyrgd og at gera okkara part fyri at liva burðardyggari. Eitt nú verða bensin- og dieselbilar skiftir út við elbilar, og oljufýr verða skiftir út við grønari orkuloysnir. Betri Banki ynskir at stuðla undir hesum grønu loysnunum og bjóðar bíligari fíggjarmøguleikar til kundar, sum velja grønar loysnir. 
 

Hetta rákið, at taka burðardyggari avgerðir, sæst eisini, tá íleggjarar skulu velja, hvørji virðisbrøv teir skulu gera íløgur í. Fleiri og fleiri íleggjarar seta krøv til fyritøkur og íløgufeløg um at taka burðardyggar avgerðir. Hetta er eitt rák, sum vit síggja um allan heim og ikki bara her í Føroyum.  

Hvussu kann ein íleggjari so vita, um ein íløga er burðardygg ella ei? Tað kann vera torført at finna út av, men ein kann peila seg av við at hyggja at ESG-talinum, og um talan er um eitt norðurlendskt íløguprógv, so kann ein kanna, um íløguprógvið hevur sokallað svanamerki. 
 

ESG stendur fyri Environmental, Social and Governance. Hægri ESG-talið er, burðardyggari verður fyritøkan mett at vera. Hugt verður at, hvussu fyritøkan ávirkar umhvørvið, og m.a. hvussu fyritøkan brúkar rávøru og vatn, og hvussu stórt CO2-útlátið er.  Kannað verður, hvussu sosialu viðurskiftini í fyritøkuni eru, um fyritøkan virðir mannarættindini, og um arbeiðsumstøðurnar og trygdin eru í lagi. Hugt verður eisini at leiðslustrukturinum í fyritøkuni, og hvussu stórur vandin er fyri korruptión og skattasviki. Trupulleikin við ESG-talinum er, at tað ikki er ein fastur standard-útrokningarháttur, og at tað eru greiningarfyritøkur, sum áseta ESG. ESG kann tó avgjørt verða nýtt til at fáa eina meting av, um fyritøkan er burðardygg ella ei. 
 

Norðurlendsk íløguprógv kunnu fáa svanamerkið, um íløguprógvið lýkur 25 ymiskar treytir. Íløguprógv, sum eru svanamerkt, kunnu m.a. ikki gera íløgur í fyritøkur, sum í stóran mun dálka umhvørvið, fyritøkur, sum bróta menniskjarættindini, og í fyritøkur, sum selja vápn.